اعجبني المحتوى

السبت، يوليو 25، 2009

حلاوة زمان عروسة حصان



يا ما نفسي اشتري بلونة يا ما نفسي اعمل فيونكة

ارجع طفلة صغنونة واجري اتنطط في السكة

خشب حصاني مرجيحة لكن.... يا ما لف بيا يامااا اماكن

ياااااااااااااااه فين ايام زمان


اما تلاقي كل يوم يمر يقربك اكتر من مجهول ما تعرفوش خايف منه خايف تديله ما تخدش منه

وتلافي نفسك عشان تروح لبكره لازم تروح وعلي عيونك غمامة سوداء عشان ما تشفهوش

اما تلاقي النهاردة اخد من امبارح كتير اوي عشان يجي وتلاقي تفسك خايف لبكرة ياخد النهاردة كله وهو جاي

و تلاقي امبارح كان لمه وعيله واصحاب وناس وحب مبدور في الارض يرتوي بضحكة حلوة يطرح راحة وامان

اما تلاقي الضفاير والكرانيش وبنت بكل براءة تجري في البيت تقول بابا جه بابا جه وتلاقي الاب يحضنها برغم كل همومه وكانه بيقول مافيش مع حب اولادي اي هم

وتلاقي في المطبخ ام كل حياتها انك تاكل وتشرب وتتعلم اصل العلم نور وتشوفك بتضحك تلاقيها واقفه وانت جايب اصحابك فجاة علي الغذا ويمكن البيت اصلا مافيهوش اكل

و تلاقي ابتسامة ترحاب ونظرة عتاب عشان فاجات امك وجبت البنت اللي بتحبها تتعرف عليها وتلاقيها هي اللي محرجة تقابلها عشان البيت مش اد المقام

اما تلاقي اخواتك كل واحد يعطيك شيء اللي من علمه واللي من ماله واللي من ملابسه عشان تظهر ادام اصحابك ال يعني الواد الفتك اللي بيعرف كل حاجة وعنده كل حاجة يوم حفلة المدرسة في اخر السنة

اما تلاقي بيتك اللي اتربيت فيه ولمتك باخواتك والام والاب وسفرة واحدة بتجمعكم في رمضان بدون اوامر ولا منع للافطار بره البيت وتبقي بتفطر وانت حاسس ان اجمل شيء انك ببيتك مع اهلك وانهم مش كاتمين علي نفسك ومضيعين عليك الفطار مع الشلة


اما تلاقي امبارح كله في ذاكرتك احداث بسييييييييييطة بس حلوة اوي وكلها بتلمس قلبك

وتلاقي نفسك فقدت كتير اوي منها لحد النهاردة ان لم يكن كلها وتلاقي بكرة مجهول ومش عارف حتعمل فيه ايه ويا تري هيجي زي ما تحب وهتقدر ترضي بيه ولا نفسك هترفضه وتفضل في نار بين امبارح وبكرة وضايع منك النهاردة




وقتها تلاقي دمعة في عيونك نفسها تنزل بس خايفة تجرح ذكريات امبارح وخايفة يغضب منها بكره

وتفضل دمعة عيونك جواها تعكس اضواء الشوارع وانت بتجري تلحق اللي فاضلك من النهاردة وقلبك بيسترجع امبارح وفكرك بيجري لمجهول بكرة

وصوت خارج من القهوة اللي ياما اخدك معاه والدك وقعد عليها مع اصحابه ونفس الصوت بيكمل الاغنيه وخارج من الكافيه اللي بيقعد فيه ابنك واصحابه ومعهاهم اللاب توب وداخلين علي الانترنت

وخارجة اخر كلمات الاغنية من الكازينوا اللي شاف اجمل ايام حبك

يطل صوت الماضي بكل حنان يقولك

كان ، و كان ، و كان

أولاد و بنات جيران براءة في كل قلب .. و عيون مليانة حب

كبرنا و عدى عمر .. اخدنا لميت مكان !
يا حنين ، يا ذكريات .. يا سنين أحلى الحاجات

نبكي العمر الجاي .. ولا العمر اللي فات !

لو كان بايدينا كنا .. وقفنا سنين زمانا

ليه يضيع العمر منا .. و تعيش الذكريات !



السبت، يوليو 11، 2009

خط احمر



*يرن التليفون .. اهلا فينك مال صوتك



الطرف التاني : لالالا مفيش حاجة انا كنت باطمن عليك بس ( ويبدأ يسرد مواقف يومه )



ترد تقوله :يااااه كل ده حصل طب ليه ؟؟ (طبعا تلاقيه خرج لك كارت اصفر وعليك تفهم ان ..ممنوع تعرف اكتر من كده .. ممنوع نتواصل لدرجة اكبر من كده ......وفجأه : ورايا شوية حاجات مضطر اقفل دلوقت



وقبل ما تقول مع السلامة تلاقي تيت تيت تييييييييييت تسبقك _ قفل طبعا
خطــ احـــــــــــــمــــــــــــــــــــر

*نقابل صديق بالصدفة
ياااااااه الزمن مر بسرعة اوي معقول كنا اصحاب في يوم من الايام ؟؟
يسرح العقل في كل اللي فات وتعيد الذاكرة كل الصور وتمر في الذهن كل المواقف اللي جمعتنا والاماكن والافكار والاهداف
القلب يدق ونبضاته تتسابق تجري وكانها بتجري ورا اللي فات من العمر عايزة ترجعه ( قول للزمان ارجع يا زمان) المهم نتبادل ارقام التليفونات الجديدة ونتكلم وكل واحد يعرف اخبار التاني ويتعرف علي الجديد في حياة الاخر وبعدين وشششششششششششششششششششششششششششششش خلص الارسال مافيش اخبار مافيش اتصال
الحياة بتاخدنا من جديد ونبعد من جديد ويمكن نتقابل بعد سنييييييييييين او لأ طبعا ...
خط احــــــــــمــــــــــــــــر


*يرجع من الشغل زهقان ومكشر وحالته حاله

مالك؟؟ لا ما فيش شيء تعبان شوية من الشغل .. الف سلامة عليك كان يوم متعب للدرجة دي ؟؟

الله يسلمك لا ابدا اليوم العادي بس حصلت شوية حاجات ( عكرت مزاجي )

خير يارب ايه حصل ؟؟؟

انا نازل ومش هأتاخر اما نرجع نبقي نكمل ( الغريب انه اما يرجع بعد قلقها طول الوقت مستحيل نقول كان في ايه).. ونحط الخط الاحـــــــــمــــــــــــر




* الووو ايوة .. ازيك ؟؟ __ الحمد لله
انت ازيك ؟؟ كويس الحمد لله ؟؟ بص معلش انا نايم دلوقت اتصل بيا بعدين ولا اقولك انا اما اصحى هاكلمك بنفسي ( طبعا ده معناه انك متتصلش يا بايخ)
خط احـــــــمـــــــــــر



*يرن جرس بيتك فجاة وبدون ميعاد سابق وانت يا دوب بتحاول تنام بعد يوم متعب اوي ( احيان يكون يوم روتيني وقاعد طول الوقت في البيت لكن حلتك النفسية مش مسعداك تستقبل حد )
تفتح الباب .. اهلا وسهلا شرفتونا .. اتفضلوا اهلا
وبعد السلامات والتحيات يتحول الحديث في لحظات الي سرد عدد من المشاكل لا حصر لها ويا سلام لو كان الضيوف اصلا يا دوب اتقابلوا عشان يطبوا عليك تبقي الزيارة ولا احسن ريبورتاج امام مخبز والناس بتشتكي احتياجها لرغيف العيش وكل واحد يقول حكايته والريبورتاج منقول علي الهوا لبرنامج حواري من اللي لا بيحل ولا بيربط
وبعد ثلاث اربع ساعات تلاقي نفسك هلكان مشوش ونفسك تصرخ وتقول كفاااااااااااية والضيوف لسة يا دوب فاكرين يعتذروا ( كنوع من المجاملة يعني ) عن انهم طبوا عليك بدون سابق انذار
وبعد ساعة كمان تلاقي كل واحد افتكر اللي عنده وقالك سلام وبدون احضان بقي وسلم لي علي الولاد تلاقيه بيقولك حنشوفك امتى تاني ؟؟؟ ابقي اتصل نحدد ميعاد .........!!!!!!!!!!!!!!!!!!!! تقفل الباب بعدهم وانت مستغرب للجملة وعلي شفايفك ابتسامة سخيفة وعلمات التعجب تتزاحم علي وجهك كتييييييييييييييييييير وترجع للسرير ( قابلني لو عرفت تنام )
خط احـــــــــمـــــــــــر


*مالك في ايه ... لا ابدا متضايقة شوية بس ..
ليه ايه حصل ضايقك ده انتي مرتاحة في كل حاجة ايه يضايقك ؟؟ ( طبعا دي وجهة نظر اساسية تكاد تكون قاعدة عامة الكل شايف اللي حواليه مرتاحييييييييييييين)
ترد هي: ابدا شيء بسيط بس متضايقة .. دلوقت ابقي كويسه
الطر التاني : ايوة يعني ليه في ايه حصل ؟؟
هو كل ما حد يسالك تقولي مافيش اومال ليه بتقعدي لوحدك وما بترديش علي التليفونات ودايما نايمة كده ؟؟
ترد : ابدا مش شيء محدد
الطرف التاني :انتي دايما كدة بتحطي حدود بينا عايزة تبقي لوحدك؟ تحبي ابعد عنك خااالص واريحك ؟؟ قولي وانا استاهل اللي يجرا لي لو سالت عنك تاني ....... تاتاتاتااااااام ويهبد الباب ويخرج ...( طبعا ده ممكن يكون زوج او اخ او اب او ام او او
او .).....
رد فعل الخط الاحـــــــــمـــــــــــــر
* وحشتنى اوى كنت فين ؟؟
الطرف الاخر : ابدا
انتظرتك طول الوقت
وتفضل تنتظر ان اي رسالة تيجي باي رد .....
الطرف الاخر: انتى عاملة ايه ؟
الحمد لله
وتفضل هي تنتظر وطبعا الفضول والقلق بيراودها بسؤال ساذج ( انت بتكلم حد مشغوول يعني )
واذا بالرد :لا ابدا عادى بس مش فايق انا هاقفل بقي
وااادي خط احــــــــمـــــــــــر
ويا سلام بقي لو لقاها لسة موجودة وهو قفل وخرج من شبكة الانترنت ...(.طبعا دي فيها مشكلة ان لم تكن طلاق من قبل ما يتخطبوا اصلا)


هي الخطوط الحمراء والخصوصية حق لنا وغير مسموح باستخدامها لغيرنا ؟
( احرام علي بلابله الدوح حلال للطير من كل جنس)