اعجبني المحتوى

الاثنين، يونيو 16، 2008

ومنين اجيب ناس

من سنين كتيرة طبعا مش عارفة اد ايه لان يظهر اسناني قربت تقع
صادفني برنامج علي القناة الاولي الارضيه طبعا
علشان كان لسة ما فيش حاجة اسمها فضائية او يعني كانت لسة غالية شوية
فموجودة عند علية القوم وطبعا معروفين علية القوم ممكن يكونوا مين
وطبعا ده لوحده دليل علي ان البرنامج كان من سنين
نقدر نقول من ايام هولاكو مثلا او نكتب رقم للسنة وجنبها ق.. ف
يعني قبل الفضائيات بتاعة البنات والحركات والعري اللي جاي وما تفكرنيش باللي فيات

نرجع للبرنامج اياااه لقيت مذيعة حلوة... طبعا حلوة اومال يعني حيطلعوا ع الشاشة واحدة تفجعنا
طبيعي انها حلوة بس ايه من ايام ستي ما اتجوزت سيدي يعني لابسه ومغطية ايوة مش محجبة لاكن محتشمه
شفت شعرها؟ اه .... وماله نعمة من عند ربنا ومش مخبياها لاكن بصراحة والحق يتقال ما شفتش غيره
شعر وجهه جميل
لالالالا ما دورتش ع الباقي اكيد كان مداري اصل ايامها كان ده العادي
مش باقولكم ما تفكرنيش باللي فات
المهم لقيتها بتكلم راجل برضه محترم لابس بدلة واخدين بالكوا مش بادي ملزق
ومسرح شعره علي الموضه ..... مسرح هه مش لامه بتوكة
شعره قصير يعني راجل حااالق شعره مش ع الزيروا انما محلوق لا عامل قصة نازلة علي عيونه ولا ديل حمار نازل علي قفاه ولا حاطط حلق ولا لابس سلسلة بفتله وبيقول انا اهه متدين مش لابس ذهب عشان حرام للرجال (( ال يعني هو ده الدليل علي انه راجل ))
المهم نرجع للمطرب اللي كان زي اي راجل وقتها واللي بيميزة عن غيرة هو انه مشهور وبيغني
طلع ميييييييييين ( علي الحجار )
ايوة مطرب لاكن مش عادي ايوة بيغني لاكن بيعلم بصوته والكلمات
طبعا مش حاقول والالحان لاني ما فهمش فيها لاكن بتفرق معانا كلنا الكلمة نيجي للمهم
الراجل المطرب علي الحجار ده كان بيقول ايه ؟؟؟
بمنتهي الفخر والاصرار والتركيز والاعتزاز وكانه بيقول لكل المشاهدين اسمعوا وعوا ......طاطاطام
قال : قال لي والدي حين بدات الغناء (( خلي اعمالك تعيش بعد ما انت تموت )) وطبعا يقصد اعماله الفنيه
يااااااااااااااااااااااااااااااااااااااااالله
ايه ده بيقول ايه الراجل ده وباباه بيقصد ايه باعمال تعيش بعد ماهو يموت
يا خبر ابيض الراجل ده بيفكر والله يااااه الحق ده بيقول كلام كبيييييييييير
ايوة بالضبط كلام كبير مش بنسمعه في ايامنا دي
باقصد طبعا ايام ق..ف ما بالكم بايام ب..ف يعني بعد الفضائيات
هو الاب ده اللي ربي كده كان من ناس غير الناس ولا الابن اللي اعتز بكلام والده ونفذه (( والدليل الاغاني اللي من سنين وسنين ولسة مش بتموت لعلي الحجار )) الابن ده من ناس غير الناس

طبعا يا جماعة وصلكم اني باقصد علي الحجار في حد ذاته ولا والده كمان انا بس باستغرب هي الناس اللي بتقدر تفكر وتنتقي وتربي صح والتربيه تفضل جوا اولادها وينفذوها وطبعا يمرروها لاولادهم راحوا فين
ده راجل فنان اسمحولي يعني وان كان برضه بياثر في المجتمع لاكن تصور ان تاثيرة ايجابي في حين ان احنا في بيوتنا بطلنا ناثر بالشكل ده
يعني اما كل مراهق يسمع له اغنيه من الحجار اللي اعتمد في اختيارة ان كلمته تكون محترمة عشان تعيش تفتكر المراهق ده حيعاكس بنت الجيران ويقولها كلام يخدش حيائها باسلوب تامر ابقي نفسي ااه...؟؟
وهي المراهقة اللي سمعت نفس الاغنيه المحترمة حترد عليه ازاي ... يا تري بخجل البنوته واحترامها ويمكن تسكت وتمشي ولا حترد باسلوب فناناتنا الجدد وتقوله بوس الواوا ...؟؟
الجملة البسيطة اللي قالها اب لابنه ممكن تصنع مجتمع ناضج له فكر وتعقل وعزيمة
ياااااااااااااااااااه طب ده فنان مش قائد يا سلام بقي لو قائد قال جملة ويا سلام لو مشينا وراه
مش يبقي مبدئنا اعمل ما بدالك بس المهم تفضل ماشي جنب الحيط
فتعيش وتموت جنب الحيط عارفين ايه اللي بيعيش ويموت جنب الحيط ؟؟؟
طبعا عارفين مش محتاجين تعريف بيه ابداااااااااااااااااااااا
كلنا محتاجين اننا نتجاوز باعمارنا اعمار الاخرين اننا نعمل شيء يعيش بعد موتنا كلنا محتاجين نطرق باب الامل حتى لو الياس محيط بينا

... في رايي هوده المقصود بالخلود
(( خلي اعمالك تعيش بعد ما انت تموت ))

بلاش اقول رسولنا الكريم صلي الله عليه وسلم عشان اكيد حنقول هو كان رسول واحنا مييين ؟
لاكن الصحابة بلاش الصحابة المقربين شوفوا القدماء المسلمين بلاش الاسماء المعروفة
خلينا نشوف جنود المسلمين
المشاه بلاش المشاه خلينا نشوف الخدم كلهم عملوا اعمال عاشت بعدهم والي الان
كلهم امنوا بفكرة واحده اتبعوا قائد كان له كلمته اللي ادت لعمل عاش بعد القائد وبعد الجنود والرماه والمشاه والخدم
ياريتنا نحاول نزرع في اولادنا البذرة دي بذرة ((الكلمة التي تصنع أمة))

طولت عليكم طبعا لاكن شوفوا الكلمات دي حتعرفوا اد ايه جملة اب اثرت في ابنه واعطيته طريقة يخلد بيها عمله دي اغنية مجرد اغنية لاكن اتمني تخلد اعمالنا بعد موتنا وتعيش للابد

على أد ما حبينا.. و تعبنا في ليالينا
الفرحة في مشوارنا.. تأني هتنا دينا
طول ما القلب صافي .. بحر العشق وافي
وكل عذاب الدنيا..هيروق بكرة لينا
بس امتى ليالينا .. عالحلم ترسينا
بين ايوة و لا ..الحب بنلقاه
ما احلى الحياة ..باصحابنا و اهالينا
وعذاب الحياة ..لما نكون وحدينا
لو نروق هيجينا ..كل ما اتمنينا
لو ممكن تطيب .. اأ حزان الحبيب
شمس الحب تطلع ..من بعد المغيب
ده احنا ياما شقينا .. من يوم ما اتنسينا
ليه ما نكونش ذكرى .. في الليلة الجميلة
ليه ما نكونش غنوة .. في الرحلة الطويلة
بس امتى امانينا .. تيجي و تدفينا
لو نروق هيجينا .. كل ما اتمنينا
........... لو نروق هيجينا كل ما اتمنينا
حقيقة الكل بيعيشها بدون ما يشعر بيها

هناك 4 تعليقات:

  1. انا ازاي ماجيتش مدونتك دي قبل كده؟؟؟

    بجد مدونه هايله ولي عندك باكو نيسكافيه لاني شربت بتاع اربع ماجات من الحجم العائلي وانا مستمتع بقرائة مواضيعك

    بس ده اكتر موضوع استفزني للتعليق بجد

    من فتره في تجمع مدونين حصل في اسكندريه .. وقلت لواحد من المدونين لما كنا بنتكلم عن ايه فايدة التدوين وايه اللي بنكسبه لما كلامنا بيتقال سواءا كان يتنشر في كتاب او في جرنان
    قلتله احنا مسيرنا هنموت .. بس كلامنا ممكن يعيش ورانا .. لو بصينا لكده .. يبقى مش هنتكلم في اي حاجه وخلاص

    ماتنسيش .. انا لي عندك برطمان فيسكافيه
    كل سنه وانتي طيبه
    ورمضان كريم




    سلامووووووووووز

    ردحذف
  2. كل اللي اقدر اقوله حاجه واحده


    خشي هنا

    www.elhaggar.blogspot.com

    ردحذف
  3. سو
    اشكرك جدا لتعليقك الجميل
    واللي دوخني علي ما عرفت ارد عليه وان شاء الله الرد يثبت المرة دي بقي

    اصل مش معقول شهرين ولسة معلق

    المهم اني فعلا سعيدة اوي بتعليقك علي الموضوع ده
    وفعلا معاك حق لو قدرنا قيمة كلامنا مش حنتكلم في اي شيء وخلاص
    ولازم نكون فاهمين ان كلامنا حيعيش واحنا حنموت في يوم م الايام

    اشكرك مرات ومرات
    وما تحرمنيش من زياراتك
    سلالالام

    ردحذف
  4. hossam7
    اشكرك جدا للزيارة
    والرابط المدهش اللي سيبته في التعليق
    فعلا ما دخلتش المدونة دي ابدا
    وما كنتش اعرف اصلا ان فيه حد اهتم للدرجة دي واتكلم ولو كلمات قليلة عن الحجار
    حقيقي متشكرة جدا لزيارتك
    واتمني تكررها يارب
    سلالام

    ردحذف

زروني كل بوست مرة حرام تنسوني بالمرة ...