اتعودت اكتب رأي بالعامية المصرية يمكن علشان بتوصل اسرع لكتير من الاصدقاء ويمكن لاني باكتب وباكون منفعلة حسب الموضوع اللي باكتب فيه
المهم ان اليوم كان ملئ بالمصادفات ومنهم صدفة غريبة وربما هي دليل لشيء ما
تلك الصدفة ... معلش لسة باقلب علي العربية الفصحي
الصدفة دي كانت الكول تون ... ايوة الكول تون لتليفوني المحمول كان كلي حزن وحيرة واشياء غريبة كده مش عارفة جت منين كلها مرة واحدة
واتصلت بصراحة للتسلية لاني لا كنت عارفة اشتغل ولا عارفة اقرأ ولا اكلم حد و اعمل اي شيء
ايوة بالضبط كده مهنجة ع الاخر ... طبعا فيه سبب وسبب مهم جارحني اوي لاكن مضطرة احتفظ بيه والعارف لا يعرف
المهم اول كلمة مرحبا بيك وشكرا لاتصالك والدباجة اياها دي وبعدها قائمة الاغاني الخمسين ويا سيدي اختار
واول اغنية تكون ايه .... ( علامة في حياتك ) ايه الاغنية دي ومين بيغنيها ما كنتش اعرف لحد لحظات قبل ما اكتب كلامي ده
وعرفت الاغنية وانها لعمرو مصطفي اصلي قديييييييييييييييمة مش متابعة اغاني للدرجة اللي اعرف مين بيغني ايه
يعني من الناس اياهم بتوع زمان اللي ودانهم تلقط الكلمة الحلوة وبس ولو مين بيغنيها حتى
المهم ان الاغنية جت ع الجرح زي ما بيقولوا بالمصري وعششت في الدماغ وجابت قهوة وشاي وشربت وربعت تتفرج علي تليفزيون تفكيري الداخلي
الاغنية بتقول ايه ...؟؟؟؟
ماشى وسايبلك علامة فى حياتك
حتفضل فاكرنى لآخر حياتك
فيه مين غيرى حبك وعاشلك بقلبه
ومين غيرى قولى ملا زكرياتك
ده انا ياما قسيت وياك واستحملت قساك
قولى كام يوم حلو شفته معاك
مين ده اللى يآمنلك بعد اللى جرالى
كلمة اسمعها منى انت مالكش غالى
دى غلطة فى حياتى وبدفع تمنها
شكلى ظلمت انا حد زمان وماخدتش بالى
ده انا ياما قسيت وياك
واستحملت قساك
قولى كام يوم حلو شفته معاك
ايووووووووووووووووووووووووووه يا جدعان ايوووه اسكندراني
يا خبر ابيض يا ناس هو فيه حد يقابل الحب بالقسوة ؟؟
هو فيه حد يحب ويحس ويتوجع والطرف التاني ولا علي باله ؟
معقول يبقي طرف واقع لشوشته كده والطرف التاني تقلالالان اوي ؟
اومال ايه اللي كنا بنسمعه عن كيوبيد وسهامه المزدوجة اللي بتشبك القلبين في لحظة واحدة ؟
معقول تحب وحبيبك يستهتر بمشاعرقلبك ؟
هو اصلا ده حب ؟
ما يمكن فاهمه غلط يا لولو وهو ده حب الايام دي _طبعا ده كان كلامي لنفسي _
كل واحد في وادي
بس الاغنية بتقول انه شاركه حياته واستحمل قسوته
يعني صبر عليه ... طيب وايه المقابل ؟ _ يظهر خلع منه وعمل نفسه مش واخد باله هههههه_
يعني تبقي الاغنية مش بتقول وجهة نظر معينه وان الحب الايام دي مجرد كلام مش احساس
ويمكن برضه كان الطرف اللي بيحب طالب اكتر من امكانيات قلب الطرف التاني ؟؟
يعني لكل واحد طريقته في الحب وامكانيات زي الحاله المادية يعني
واحد كريم زيادة والتاني بخيل زيادة
يا دي المصيبة حد يبقي بخيل في المشاعر ؟؟؟؟
لاكن نرجع ونقول ممكن
انما في النهاية وزي ما الاغنية بتقول ان طرف تعب وزي ما بنتكلم كده جاب اااخره ( فيه طرف حب وطرف قسي عليه)
يا تري ايه الحل ... انه يسيبه ؟ ويرضي بجرح قلبه في بعده ؟؟
ولا يفضل جنبه ويرضي بجرح قلبه من شدة قسوته ؟
وياتري اي حل منهم هو الاصوب واللي ممكن يحتمله ولحد امتي ؟
شوفتوا يا جماعة اهي بقت مشكلة
استهتار بمشاعر شخص يحبك اصبح مشكلة بالنسبه له ولك
وحطيته بين قرارين كل واحد فيهم بيجرحه جرح اكبر من التاني
وبقيت مسئول عن قراره رغم ان هو اللي بيختار ومسئول عن جرحة في بعدك وقربك
طبعا الاغنية بتقول انه بعد عنه
لاكن واضح من الكلمات اد ايه جرح الحبيب اللي بعد من حبيبه
واد ايه بيتعذب ويتألم ويفتكر كل شيء بينهم
لاكن لوحد فعلا كان في الموقف ده يا تري يعمل ايه ؟ وحيستحمل لحد امتى ؟ وازاي ؟
الاهم من الاغنيه هو اللي قابلته في تفكيري
احنا ليه مش بناخد بالنا من حب الناس لنا ؟
لو كل واحد راجع حساباته حيلاقي انه مقصر مع الناس اللي بيحبوه
مش بس الحبيب .... للاسف بقينا بنقصر في اظهار الحب والرحمة لكل اللي حوالينا
ويمكن منهم ناس محتاجين اوي ولو كلمة لطيفة في وقت ضيق
او ابتسامة حنونه في لحظة ضعف
او حتى رنة تليفون تعرفهم انهم علي بالنا
الحاجات دي صغيرة اوي وفي اصغر منها اكيد وغير مكلفة باي شكل
لاكن بتفرق كتير بين الناس اللي يحبونا
رسولنا الكريم ( صلي الله عليه وسلم )قال :
تبسمك في وجه اخيك صدقة ( صدق رسول الله صلي الله عليه وسلم )
يعني الكرم في المشاعر والاحاسيس وطريقة اظهارها للاخرين
سنه من سنن النبي الكريم
فييييييييييييييييييييييييين التزامنا بدينا
وفين رقة القلوب وفين الحب الحقيقي
يارب نقدر نعيد حساباتنا ونعطي كما نأخذ
