اعجبني المحتوى

الخميس، أغسطس 27، 2009

البنت زززززي الولد ( 4 6 4 )



البنت زي الولد مبدأ اتربينا عليه مافيش فرق بين ولد وبنت

الغريب اننا اتربينا علي الكلام ده بدون ما نسمعه

جوانا فاهمين كويس جدا ان البنت مش زي الولد وان فينا من الضعف اللي يفيض علي كل اقوياء العالم

ويجعل هرقل مثلا في ضعف نملة سليمان وحذرها

البنت زي الولد اسلوب تربية بتدفع ثمنة البنت دايما للاسف

الاب بيربي بنته علي ان لها شخصية ولها رأي في ادق تفاصيل الحياة وياخذ برأيها ويعظم طريقة تفكيرها ويتحول الحوار بينهم من الامر والنهي الي الاخذ والعطاء والرفض والنقاش

الام بتصاحبها جدا من باب ان كبر ابنك خاويه ومن خوفها عليها ولضعفها الداخلي كمان

لكن مع الوقت بيكونوا اصحاب بجد وبتذوب الحدود والفواصل بينهم وبتذوب الرهبة من الام وتتحول حين تجمدها مرة اخري الي ود ومحبة من نوع جديد من نوع محبة الاصحاب

وخلال الاحداث دي بيكون الاب والام فخورين ببنتهم ولنضج تفكيرها وحيويتها وثباتها في التعبير عن رايها وتحمل مسئوليته كمان ومع تقدم العمر بتتعود البنت علي الطريقة دي وتواجه بيها حياتها

انما ايه يا تري بيكون جوا البنت ؟؟

محدش فيهم فكر يا تري هي سعيدة لطريقة تربيتها دي ؟؟

هل سعيدة لان لها رأي ؟

هل سعيدة لان لها شخصية مستقلة ؟؟

طيب واذا سعيدة بكل ده هل يا تري المجتمع المحيط بيها خارج الاسرة لا بل خارج الاب والام فقط هل يتيح لها فرصة البقاء علي نفس نهج تربيتها ؟؟

هل يستوعب الاخرين هذا؟

ليكن الجميع سعداء بما قدمه الاب والام من فتاة ناضجة لها فكر وشخصية مستقلين عن اي آمر او ناهي

انما المشكلة الحقيقية اذا البنت اللي اتربت بطريقة البنت زي الولد ( 4 6 4 ) ولم تسمعها قط وانما قد تكون سمعت ما يعاكسها تماما من ان ياريت كان لي ولد كان وقف جنبي وانتي برضه مهما كنتي بنت ومش كل شيء تقدري عليه

هل البنت دي فعلا بالقوة التي تجعلها زي الولد ؟؟

طبعا مش باقصد القوة الجسدية

اسمحولي اعبر عن رايي في التربية دي بجد واللي للاسف اتربيت بيها وفضلت سعيدة بيها عمري كله

لحد ما اصبحت باواجه ضغوط خارج اطار الحياة وسط ابي وامي رحمهما الله

لاول مرة بعد وفاة ابي اجدني مجرد انثى ترتدي قنااااااع من القوة

نعم مجرد قنااااااااااع

كل ما فعلته بحياتي كل ما نضجت عليه كل ما اسعدني مجرد استماع اسرتي اليه فعلته وانا ارتدي قناعي الزائف

قناع القوة واللا مبالاه والثقة الزائفة بالنفس

الان حين ادقق النظر في نفاصيلي الداخلية اجدني مجرد انثي مجبرة علي التعايش مع ضعفها الذي ترفضه تمام الرفض

وتعيش بين شقي الرحى ...القناع الذي ارتدته طوال حياتها وضعفها الذي يثير داخلها آلآم لا حصر لها

منتهي التناقض ان تعيش بقناع القوة وداخلك اضعف ما يمكن فتتصرف مع كل ألم وكأن شيء لم يكن ولكن داخلك يؤثر الالم بل يعتصرك عصرا

للاسف حين واجهت بنات جيلي وطبعا مش كل الجيل انما كل البنات اصحابي اللي اتربوا بنفس الطريقة ( 4 6 4 ) البنت زي الولد ... اكتشفت انني لست الوحيدة من هذا النوع المقننع بل ان لكل منهن قناع والغريب انه قناع من القوة بتتصرف من خلاله مع كل صعاب الحياة

الاغرب بقي ....

.....

.....

اني ولا فخر طبعا

الوحيدة بينهن التي اعترفت بذلك وقالت وبعلو الصوت

عايزة اروح لطبيب نفسي يا جماااااااااااااعة

انا عايزة اعيش صح

بدون قناع ايه يعني اني اكون ضعيفة ويتقبل اللي حواليا ده ما اناقوية في موقف اخر ليه يعتبروني بوشييين ؟؟

ليه دايما مطلوب مني اكون قوية في كل المواقف ومفيش مكان لضعفي هو احنا مش بشر؟؟؟

اما رد فعل بنات جيلي كان علي طريقة تربيتهن (( لالالالا اوعي انتي مجنونة عايزانا نبان ضعفاء لا يا بنتي انتي كده هتروحي في الرجليين))

وهتلاقي نفسك وقت ضعفك مضحوك عليكي ووقت قوتك متربص بيكي

واللي يعتبرك مجنونة
واللي يعتبرك شيطانة بتتمسكني لحد ما تتمكني

واللي يعتبرك ملاك ويضغط اعصابك لحد ما تطقي من جنابك

واللي واللي واللي

اما ردي فبأعلنه الان عبر المدونة

لكل من لم يقرأ التعريف الخاص بيا

انا لست شيطاانا ولا ملالالالاكا

انا بشر

اخطئ واصيب

اضعف واقوى

اتألم كاي كائن حي

لي حقوق وعلي واجبات

اريد ان احيا مجرد حياة بشرية طبيعية بها كل التناقض ولكن تناقض متنااااااغم لا تناقض مؤلم يؤخذ عليا

ياتري بأطلب حياة غير موجودة في دنيتنا ؟؟؟

هناك 19 تعليقًا:

  1. كل سنةوحضرتك طيبة ورمضان كريم

    ربنا يتقبل منا ومنكم

    في حفظ الله

    ردحذف
  2. قلم رصاص
    كل سنة وحضرتك طيب بخير يارب
    اشكرك جدا لزيارتك المدونة ويارب
    يدوم الزيارات
    تحياتي

    ردحذف
  3. السلام عليكم زهرة التوليب

    تحياتى

    كل سنه وانت طيبه ورمضان كريم

    يا ريت يا زهره التيوليب اقدر اعزمك بجد على الفطار كان يبقى فطار سعيد وجميل

    بالنسبه للبوست

    با بنيتى مهما قلنا ومهما فعلنا ومهما ربينا البنت على انها زى الولد

    الحقيقه الوحيده انها ليست زى الولد

    لانها هى من تواجه الحياه بهذه التربيه ومطلوب منها ان تكون زوجه رجل وام رجل واخت رجل وبنت رجل وتتصرف تصرف الرجال مع انها انثى وجمالها فى انوثتها ورونقها فى انوثتها .... يعنى لو اتربى ولد على انه انثى هل يكون هذا طيبا وكيف يتعامل مع الرجال وهو بتربية انثى وكيف ايضا يتعامل مع النساء بتربية انثى وهو ليس بانثى ....

    المطلوب تصحيح بعض المفاهيم عن تربية البنات وتربية الصبيان وكل يأخد حق جنسه فى التربيه ... هنا نستطيع ان نتوازن وان ياخذ كل حقه سواء انثى او رجل

    كل سنه وانت طيبه

    ردحذف
  4. كل سنة وانت طيبة ورمضان كريم
    ازيك وازي أخبارك أنا جيت أسأل مخصوص أهوه
    ربنا معاكي يارب
    سلام

    ردحذف
  5. فشكوول
    زيارة عزيزة والله علينا
    وانا باتفق معاك في رايك ان المراة مضطرة دايما تتعامل زيها زي الولد لانها دائمة التواجد وسط الذكور اما اما او اختا او ابنة او زوجة وعلي هذا فلابد لها من التعامل الدائم بطريقة تتيح لها التفاهم معهم
    ولكن للاسف لا يدري الرجل زوج كان او ابن او اخ او اب فاضل لا يدري ابدا ما تواجهه من ازدواج داخلي وضغط عصبي لتتبع تلك الطريقة التي لا تناسب نعومتها ورقتها اغلب الوقت

    اما العزومة فالكرم كله عندك
    ربنا يخليك يارب وبالهنا والشفا لك ولاسرتك يارب
    تحياتي

    ردحذف
  6. كاتب مصري
    كل سنة وحضرتك بكل خير وسعادة يارب
    وكل رمضان والجميع بخير
    اشكرك جدا علي السؤال والزيارة واكيد مردودة ان شاء الله
    تحياتي

    ردحذف
  7. كل عام وانتى بخير ومش تقلقى مش محتاجة دكتور نفسى ولا حاجة الموضوع بس عايز شوية تظبيط, تحياتى

    ردحذف
  8. البنت زى الولد فى الحقوق بمعنى الرعايه الحنيه الاهتمام تعليما وجميع النواحى

    البنت عمرها ماهتبقى زى الولد فسيولوجيا ولا تحملا لان الله قال لادم وحوا "فَقُلْنَا يَا آدَمُ إِنَّ هَذَا عَدُوٌّ لَّكَ وَلِزَوْجِكَ فَلَا يُخْرِجَنَّكُمَا مِنَ الْجَنَّةِ فَتَشْقَى "

    الحديث كان موجه للاتنين بس الشقاء كتب على ادم بس لان المرأه مش مؤهله للكد والتعب بس هى مؤهله لكل حاجه خاصه بؤنوثتها كمرأه وممكتها كزوجه والرجل لا يستطيع ان يتعمل شغل البيت مثلا لدقائق وقد يطيق العمل كحداد مثلا


    أخيرا انتى خلتينى اتصل بأختى لانها اسمها ولاء برده مكنتش كلمتها من فتره... حبيت اقولك عشان تعرفى انك أخدتى ثواب


    سلام

    ردحذف
  9. karim
    اهلا وسهلا بيك في المدونة
    نورتني
    كل سنة وحضرتك بكل خير وسعادة يارب
    في الواااااااااااقع
    انا مش قلقانة انا باعترف باحتياجي للطب النفسي وده برضه عشان التظبيط زي ما حضرتك قلت
    لان صعب اوي تتعامل بقناع عمرك كله وفجاة تشيل القناع وتظهر ضعفك وتعرف كمان تتاقلم علي نظرة الاخرين اليك بسهولة ... صح ؟؟
    نورتني بزيارتك ويارب مش الاخيرة ابدااااااااااا

    ردحذف
  10. ابو كريم
    كل سنة وحضرتك بكل خير
    رمضان كريم يا ابو كريم
    وكل سنة واختك بكل سعادة وخير يارب
    انا مع حضرتك ايضا في ان البنت زي الولد في الحقوق والرعاية ... لكن حضرتك مش عايا في ان اليوم المراة تواجه الكثير من الهموم والاعباء وده بيخليها فعلا متساوية مع الرجل في الشقاء الي حد كبير ؟؟
    والمشكلة اللي نوهت عنها في التدوينة دي هي ياتري البنت مع كل اللي بتواجهه في مجتمعنا ومع كل النداءات المسموعة عن حقوق المراة هل هي سعيدة ؟؟
    انا شخصيا لست سعيدة باني اعامل في مجتمعي كالرجل وعليا مثل ما عليه من واجبات واتمني ان يرجع مجتمعنا مجتمع رجل وانثي ولكل واجبات مختلفة عن الاخر
    تحياتي وشكري لتشريفك المدونة

    ردحذف
  11. قرأت الموضوع منذ يومين تقريبا وانا اشيد بقدرتك على سرده بهذه الكيفية من الإفراد والوضوح رغم تشعب عناصره لدرجة حيرتي من أى جزئية ذات الالوية القصوي ابدأ

    عموماافضل الارتجال فى مثل هذه الاحوال

    فعلا البنت مش زي الولد ، والنظرة التقليدية التي شاعت فى اواسط القرن الماضي من انه لا فروق بيولوجية بين الجنسين غير وظيفة الحمل فقط ، وان الامومة ليس فرقا جوهريا في الاختلاف ، نظرة ماتت بعد ثورة (آن موير ) بكتابها جنس الدماغ واثبتت ان الفروق موجودة وكاملة فى كل سمات الشخصية شعورية او لا شعورية ، مخالفة بذل فلسفة النوع الاجتماعي ( الجندر) التي تتنكر لهذه الفروق

    وهنا يتدخل عامل مهم جدا فى هذا الاتجاه ، وهو اسلوب التربية التي تفضلتي بالحديث عنه ، وفق انساق المجتمعات المتباينة
    لكنا لا نستطيع انكار تكوين الاسرة لشخصية البنت بدعوي انها تختلف عن حقيقتها ، فحقيقة الأنثي كأنثي لا تتعارض ابدا مع تربيتها على تكوين شخصية مستقلة ، فكلا الطرفان به من القوة التي تتناسب مع ادواره فى الحياة ، حتى لو كانت هذه الادوار مكتسبة

    والضغوط التي قد يواجهها احد ما ، ربما نتعرض لها جميعا بأشكال متنوعة ، ولا يعبرها إلا من يملك مفاتيح شخصيته المتزنة الواثقة ، التي تعرف الفرق المفترض والدور المتوقع بين نوعه ، وتفكيره ، ويقع بين براثن الضغوط من يفقد ذلك بسبب خلل ما فى الشخصية او خلل ما صبغته الظروف المحيطة وهي كثيره وعلي الجميع بلا استثناء

    لا وجود للقوة المطلقة ، ولا فضل للضعف الدائم

    تري من يقوم بتقديم القناع لنا ؟
    وهل نحن من نرتديه طواعية ونجهل ذلك ، أن كل الاقنعة تسقط فى لحظة صدق مع النفس ويطول ذلك الجميع بلا استثناء

    سأقدم لم يشعر بانه صريع ضغوط ما ، ان يقلع عن اكتشاف نفسه من خلال نظرات الاخرين ، يكفي ان ينظر هو لنفسه فيقييمها ويقدرها قدرها

    اتأسف على الإطالة

    تحياتي

    ردحذف
  12. حاول تفتكرني ..
    دائما ما تناقش بمنتهى الموضوعية وتغوص في اعماق النفس ,, اتفق معك ان الضغوط علي الجميع وتصيب الجميع لحظات ضعف فلا نفهم هل القناع نرتديه بانفسنا ام انه فرض علينا ام ان ظروفنا او تربيتنا اجبرتنا علي ارتدائه ام اننا تعودنا ذلك ليس الا ..
    ولكن ليس الكثير منا يملك مفاتيح شخصيته ويثق بها في جميع النواحي بلا استثناء .. فمن منا واثق تمام الثقة من نفسه وقرارته وتصرفاته وان وثق في قراره والدور الذي يؤديه في المجتمع فهل هو واثق من ردود افعال الاخرين تجاه قراره او تصرفه؟؟
    هل ان صرخت الانثي وقالت بوضوح انا انثى ليس الا بي من الضعف ما ينعش قوتي ويزيدها تحدي هل تضمن ان يتلتقي بالرجل الذي يحتمل ضعفها ولا يعتبرها الستوتة التي تقبع في منزله ليس لها سوى ان تاكل وتشرب فقط وليس لها الحق في مشاركته الرأي والقرار؟؟؟
    اظنها هنا لابد ان ترتدي قناعها مرة اخري
    لم تطيل في التعليق سيدي بل انك اثريت الموضوع بتعليقك واخدتنا الي اتجاهات جديدة لابد لنا بالتفكير فيها
    شرفتني زيارتك
    تحياتي

    ردحذف
  13. السلام عليكم

    تقبل الله طاعتك
    وأتم بالعيد فرحتك
    وأقر عينك بنصر أمتك

    كل عام وانتم بخير

    ردحذف
  14. كل عام وانتم بخير

    تمنياتي بقضاء عيد سعيد:)

    ردحذف
  15. المدونة جميلة جدا جدا جدا

    وبجد مبسوطة اوى انى جيت هنا واتعرفت على المدونة الجميلة دى اللى اكيد بتعبر عن جمال صاحبتها

    ميرسي اوى لزيارتك وتعليقك عندى في مدونتى المتواضعة

    ونورتينى ياقمر واتمنى دوام التواصل

    ردحذف
  16. نظرة المجتمع المتخلف للطبيب النفسي لازالت موجودة حتى يومنا هذا

    ولولا هذه النظرة لكان هناك حديث مطول عن هؤلاء الاطباء النفسيين

    اما بخصوص البنت والولد

    فانتي فعلا اول بنت الاقيها بتتحدث بكامل صدق

    ان فعلا البنت مش زي الولد

    تحياتي لكِ

    ردحذف
  17. ريمييم الف شكر يا جميلة علي الزيارة العسولة دي
    ورايك في المدونة ربنا يكيرمك يارب
    وطبعا هيستمر التواصل ان شاء الله
    تحياتي

    ردحذف
  18. احمد عاطف
    اشكرك جدا للزيارة نورتني بالمدونة والله
    وانا باتفق معاك واعلنا واردد بصوت عالي يا جماعة الطبيب النفسي مش وصمة عار في جبين مرضاه بالعكس انا في رايي ان كل مريض قدر طبيبه يعالجة مفروض يستمر علي صداقة دائمة معاه وينشر المشكلة وحلها وازاي قددر الطب النفسي يخرجه من المشكلة او الاضطراب اللي كان بشخصيته
    وبكده يبقي قدرنا نخرج من دائرة الاتهام بالجنون الي مصالحة النفس

    سعيدة بريك في الطبيب النفسي وان البنت مش زي الولد ودي حقيقة بعيدا عن نوعها كانثى
    شرفني حضورك للمدونة
    تحياتي لك

    ردحذف
  19. حرووف
    اهلا بيكي نورتيني والله
    وطبعا انا مستعدة جداااااا ومن بكرة نروح سوا
    ده انا مصدقت انك تشجعيني وخاصة انك بلدياتي
    بيقولواايه بالبلدي اهو نقصر طول بعض
    ههههههههههه
    نورتيني ا قمر ربنا ما يحرمني من نورك ابدا

    ردحذف

زروني كل بوست مرة حرام تنسوني بالمرة ...