انا عاديبقالي سنين
بعيش عادي
لا انا مرتاح ولا تعبان
لا انا رافض ولا راضي
لكن.. عادي
في يوم زهقان
في يوم قرفان
ويوم بضحك ويوم برقص
بيوم موجود ويوم راحل
واهو عادي
كده بتعدي ايامي
لا يوم فكرت ولا قررت
يميني ينادي اروح عادي
شمالي ينادي اروح عادي
اهي ماشية
صحاب احباب ولا وحيد
اهو عادي..
وفجاة جالي اللي ماكان علي بالي
عيون بتشوف
وشوق ملهوف
وعقل يقولي مش عادي
ولما اهرب يرجعني
وجوا الارض يزرعني
يقولي فوووووق
هنا ارضك كفاية تطير
سنينك ضايعة في الغفلة
وكسرك خير؟؟
ده مش عادي
جناحك رابطة في حجارة مهوش بيطير
شعاع نورك حزين مجروح
لا بتشوف الفضا واسع
ولا شايف في غيره ضيق
ده مش عادي
حقوقك فين
صحابك مين
طموحك ايه
كلامك ايه وايه معناه
نهارك ليه بقي ليلك
وليلك ليه ملوهش نهار
وشمسك نايمة ما بتشرق
ودخانك مغطي كل احلامك
ده مش عادي
لقتني بلف في سجايري
وده عادي
وباخد وادي مع نفسي
ما انا عادي
باكل عادي
وبشرب برضه اهه عادي
ومالي جيوبي بفلوسي
تمام عادي
لقيت مخي بيغلي يقول :
كفاية ارحمني م العادي
بقالي سنين بطاوع فيك
بموت جواك من الغفلة
وألمي صراخ متسمعهوش من الاصوات دي والدوشة
مغيبني بمرة حشيش ومرة شهوة في العتمة
يا اما تفوق يا اما تموت
لكن هتعيش بدخانك في احلامك وشهواتك
لا اسمحلي
ده مش عادي
دي غفلة انت غاويها
ف تووه فيها لوحدك
لا ما تطلبشي
معاك انسان
ما ده اللي اخترته م الدنييا
تكون عادي
بزمن عادي
تعيش عادي
تموت ...
غفلان
بقلب جبان
ما ده العادي
walaa 16_5_2011
يالله
ردحذفالف حكاية في بوست واحد
الف نصيحة ، الف رواية
منطق فصيح ، كلمات مكتوبة بعناية
أحببت العامية من صلاح جاهين ، ومش اي حد يكتبها
احييك بشدة
تحياتي
الله عليك بجد
ردحذف:))
معلم والله
بقالي كتير ما قريتش حاجة حلوة كده :))
حاجة معبرة وبسيطة وعفوية وما فيهاش كلكعة ولا فذلكة :))
بجد قصيدة مش عادية
استمر يا كبيــر
:))
خالص تحياتي
الف شكر وشكر لمرورك ..حاول تفتكرني
ردحذففين احنا وفين جاهين
هي مجرد حاولات للعامية
سعيدة لانها نالت اعجابك
باشا
ردحذفدايم مرورك حيوي
خالص الشكر لك