شقع بقع هزة اوتار
هزة تميل قلب
وهزة يادوب هزار
دي هزة عشان تلين
ودي هزة عشان تثار
ودي هزة ارضية تجيب
الدمار
الكرسي هزاز يا ولاد
وده مش ذنب الكبار
وكل من قعد هز
الاوتااار
شقع بقع هزة اوتار
اتفرج يا جدع
ادي بقعة سودا في
فلسطين
سابت سواد ع الجبين
وادي بقعة سودا فوق الخليج
سابت العلم المخطط
يرفرف شمال يمين
ويادي العجب
بيمسكه عربي اصيل
وااقف مضبوووط كالقلم
ويقول كمااااان
شقع بقع هزة اوتاار
هزة وتر ترفع رايات
تثور تغير أللللف توور
هزة وتر تدوس رايات
ثارت كما زوبعة وراحت تنام
كل الرايات مبقعة
وقهوة سادة موزعة
بقعة سلام بقعة حروب
سلام مطيع زي الخروف
وحروب كلام وسيوف ورق
شقع بقع هزة اوتار
مدفع بدانه مزوقة فوقه
بطل
شديد يا جندي المعركة
مرسوم بكراس الولد
..!
مر الهوا قلب الورق
..قطع الورق..
لف الفلافل بالبطل
...
بقع بزيت مغلي رخيص
وناس بتاكل جنب حيط
شاف العجايب في البلد
اما جمييييييل رسم
الولد
كرمش ياعم وقوم نشوق
لقمة هنا ولا هنا
ياما نفسي اسافر
وابني بيت واجيب ولد
اسمر كحيل يشد حيلي
اللي انتني
اركب هنا يلا وسافر
بشهاداتك راح تكون
مليونير
ولا امير ولك قصور
وعبيد كتير
شهادات دي ايه
أللللبس في حيط
وسنين مطبق ع الشهادة يغسل صحون يكنس شوارع الغريب
جاب الفلوس.. فرح
الغريب ..راجع بشنطة بعد بؤجه مبقعة
ركب الغريب ..غرق
الغريب في العبًارة الورق
شوف ياجدع ادي بقعة
حمرا بلون الدم تنزف وجع
شقع بقع هزة اوتار
شغال حمار
يحمل اسفار
وليل نهار حاضر
ياباشا
وتحت امر المحترم ...
تحت شجرة ينام قتيل
ما يلحق حتي يقضي وسط
ولاده ليل
يقول بملح اغمسها ولا
اسيبش البلد
ويمد ايده بعد عتمة
ليل طويل
يلاقي نفسه في الهواا
اااااه يا بلد
30 سنة جنب حيطك ماشي ومطاطي
رزق العيال مربوط بطناشي وسكاتي
لو نطقت افايا يورم
وعيال تجوع
والست تبقي بقعة ميري
قدام عيوني يبقعوها
عذاب وذل
وفي امن دولة ولا تهمة
ملفقة ورا شمسك اروووح
وتتوه عيالي وسط زحمة
تصريحاتك
اخرتها اطلع طول عمري
توور
بدور بساقية بتروي
ارضي لحد تاني ؟؟!
شقع بقع هزة اوتار
ثورة معدية سخنتني
وانا لا ليا ولا عليا
لا اعرف حقوق ولا
حرية
ولا يعني ايه البتاعة
دي العدالة الاجتماعية
كل اللي قلته معاهم
عيش للعيال والولية
طلعوا عليا بلطجية
وفين بيوجع
اه يابلد همجية
طلعوا لي غيرهم
ادوني زيت ودقيق وسكر
وسمن هولندية
علم هنا .. علمت
وارفع ياجدع علي كرسي
الجمهورية
باقي التموين فين .؟
طب حتي كل حين ومين ...!
موت يا حمار ..مش قلت
اخوانية وعلمت في الخانة ديه ..!
قلت اهلااااااا تعظيم سلام من تاني لرئيس الجمهورية
شقع بقع هزة اوتار
وادي هزة شمالية
شرقية
تروح فيها من جيشي
رقاب
وهزة تانيه غربية
صحراوية
تدخل فيها بنادق رش
واعشاب ادمانية
واخرتها هزة جنوبية
هتنشفها ع الجعوز والشباب
ولا الاقي حتي نقطة من المية
هزة كده .. هزة كدة
.. يابلد بترقص
فوق سلم الاضطراب
حبة فوق وحبة تحت
رقصك يابلد كله عذاب
في عذاب
بقعك اصيله من اصل
النسيج
لا تزول برابسو ولا مبيض او مزيل
واوتارك مهوية محتاجة
حبكة ايد حديد
مش كلام ع الفضائية
شقع بقع هزة اوتااار
walaa
ليست هناك تعليقات:
إرسال تعليق
زروني كل بوست مرة حرام تنسوني بالمرة ...